ಪೀಠಿಕೆ :ಇಂದು ವಿಶ್ವವು ಎದುರಿಸುತ್ತಿರುವ ಅತಿದೊಡ್ಡ ಸಮಸ್ಯೆಯೆಂದರೆ ಅದು ಜಾಗತಿಕ ತಾಪಮಾನ ಸಮಸ್ಯೆ. ಭೂಮಿಯು ಒಂದು ಸಾಮಾನ್ಯ ತಾಪಮಾನವನ್ನು ಹೊಂದಿರುತ್ತದೆ. ಅದಕ್ಕಿಂತ ಹೆಚ್ಚಿನ ತಾಪಮಾನವಿದ್ದಾಗ ಅದನ್ನು ಜಾಗತಿಕ ತಾಪಮಾನ ಎನ್ನುತ್ತಾರೆ.
ವಿಷಯ ವಿವರಣೆ: ತಾಪಮಾನವು ದಿನದಿಂದ ದಿನಕ್ಕೆ ಹೆಚ್ಚಳವಾಗುತ್ತಿರುವುದು ನಮ್ಮೆಲ್ಲರ ಗಮನಕ್ಕೆ ಬಂದಿದೆ. ತಾಪಮಾನದ ಹೆಚ್ಚಳದಿಂದ ವಾತಾವರಣ ಬಿಸಿಯಾಗುತ್ತಿದೆ. ಮಳೆ ಕಡಿಮೆಯಾದೊಡನೆ ಸೆಖೆ ಜಾಸ್ತಿಯಾಗುತ್ತಿದೆ. ಕೆರೆ ಬಾವಿಗಳ ನೀರು ವರ್ಷದಿಂದ ವರ್ಷಕ್ಕೆ ಕಡಿಮೆಯಾಗತೊಡಗಿದೆ. ಕುಡಿಯುವ ನೀರಿನ ಅಭಾವ ಎದುರಾಗಿದೆ. ಭೂಮಿಯು ಬರಡಾಗುತ್ತಿದೆ. ಗಿಡಮರಗಳು ಅಧಿಕ ತಾಪಮಾನದಿಂದ ನೀರಿಲ್ಲದೆ ಸಾಯುತ್ತಿದೆ. ಧ್ರುವಪ್ರದೇಶಗಳಲ್ಲಿ ಉಷ್ಣತೆ ಜಾಸ್ತಿಯಾಗಿ ಹಿಮ ಕರಗಿ ನೀರು ಸಮುದ್ರವನ್ನು ಸೇರಿ ನೀರಿನ ಮಟ್ಟ ಜಾಸ್ತಿಯಾಗಿ ಪ್ರವಾಹ ಬರಬಹುದಾದ ಸಾಧ್ಯತೆಯಿದೆ. ಇದರಿಂದಾಗಿ ಕಡಲ ಬಳಿಯ ವಸತಿ ಪ್ರದೇಶಗಳು ಮುಳುಗಿ ಸಾವು-ನೋವುಗಳು ಸಂಭವಿಸಲೂ ಬಹುದು. ಜಾಗತಿಕ ತಾಪಮಾನದ ಹೆಚ್ಚಳದಿಂದ ಆಹಾರ ಉತ್ಪಾದನೆ ಕುಸಿಯಬಹುದು. ಚಂಡಮಾರುತಗಳು ಅಪ್ಪಳಿಸಬಹುದು. ರೋಗರುಜಿನಗಳು ಎಲ್ಲೆಂದರಲ್ಲಿ ಹರಡಬಹುದು. ಪ್ರಾಣಿ, ಪಕ್ಷಿ ,ಮನುಷ್ಯರು ನೀರು ಹಾಗು ಆಹಾರವಿಲ್ಲದೆ ಉಷ್ಣತೆ ತಡೆಯಲಾರದೆ ಸಾಯಬಹುದು.
ಜಾಗತಿಕ ತಾಪಮಾನದ ಹೆಚ್ಚಳಕ್ಕೆ ಅನೇಕ ಅಂಶಗಳು ಕಾರಣವಾಗಿದೆ. ಇದು ಕಂಪ್ಯೂಟರ್ ಯುಗ. ನಾವು ಎಲ್ಲ ಕ್ಷೇತ್ರಗಳಲ್ಲೂ ಮುಂದುವರೆದಿದ್ದೇವೆ .ಆಧುನೀಕರಣ, ಯಾಂತ್ರಿಕರಣ, ಕೈಗಾರಿಕೀಕರಣದ ಮೂಲಕ ಪ್ರಗತಿಯನ್ನು ಕಾಣುತ್ತಿದ್ದೇವೆ. ಆದರೆ ನಮ್ಮ ನಾಶಕ್ಕೆ, ತಾಪಮಾನದ ಏರಿಕೆಗೆ ನಮ್ಮ ಈ ಏಳಿಗೆಯು ಕೂಡ ಕಾರಣ ಎನ್ನಬಹುದು. ವಾತಾವರಣದಲ್ಲಿ ಇಂಗಾಲದ ಡೈಆಕ್ಸೈಡ್ ನ ಪ್ರಮಾಣ ಜಾಸ್ತಿಯಾಗಿದೆ. ಇದನ್ನು ಸರಿದೂಗಿಸಲು ಹೀರಿಕೊಳ್ಳಲು ಬೇಕಾದ ಅರಣ್ಯ ಪ್ರದೇಶಗಳು ಮಾನವನ ದುರಾಸೆಗೆ ಬಲಿಯಾಗಿದೆ. ಇದರಿಂದಾಗಿ ಹಸಿರು ಮನೆ ಪರಿಣಾಮ ಉಂಟಾಗಿದೆ. ಸೂರ್ಯನ ಅತಿನೇರಳೆ ಕಿರಣಗಳನ್ನು ತಡೆಯಬಲ್ಲ ಓಜೋನ್ ಪದರವು ತೂತಾಗಿದೆ. ಈ ಕಾರಣದಿಂದ ಅತಿನೇರಳೆ ಕಿರಣಗಳು ಭೂಮಿಯ ಮೇಲೆ ಬಿದ್ದು ಮತ್ತಷ್ಟು ತಾಪಮಾನದ ಹೆಚ್ಚಳಕ್ಕೆ ಕಾರಣವಾಗಿದೆ.
ಉಪಸಂಹಾರ: ನಮ್ಮ ವಿಜ್ಞಾನಿಗಳು ಇದಕ್ಕೆ ಪರಿಹಾರವನ್ನು ಕಂಡುಕೊಳ್ಳಲು ಹಗಲು ಇರುಳು ಶ್ರಮಿಸುತ್ತಿದ್ದಾರೆ. ಇನ್ನಾದರೂ ನಾವು ಎಚ್ಚೆತ್ತುಕೊಂಡು ಗಿಡಮರಗಳನ್ನು ನೆಟ್ಟು ಬೆಳೆಸಬೇಕು. ಅರಣ್ಯಗಳನ್ನು ಸಂರಕ್ಷಿಸಬೇಕು. ಜನರಿಗೆ ತಿಳುವಳಿಕೆ ನೀಡಬೇಕು. ಪರಿಸರ ಮಾಲಿನ್ಯವನ್ನು ತಡೆಗಟ್ಟಿದರೆ ಮಾತ್ರ ತಾಪಮಾನ ಹೆಚ್ಚಳವನ್ನು ಸ್ವಲ್ಪ ಮಟ್ಟಿಗಾದರೂ ಕಡಿಮೆ ಮಾಡಬಹುದು.
-ಉಷಾ ಪ್ರಸಾದ್
ನಿಮ್ಮ ಅನಿಸಿಕೆಗಳನ್ನು ಕಮೆಂಟಿನ ಮೂಲಕ ತಿಳಿಸಿರಿ.
🙏ಧನ್ಯವಾದಗಳು 🙏